दियो थाइल्याण्डले नेपाललाई जितको लागि ९० रनको लक्ष्य
आईसीसी १९ वर्षमुनि (यू–१९) महिला टी–२० विश्वकप एसिया छनोटअन्तर्गत मंगलबार भएको खेलमा थाइल्याण्डले नेपाललाई जितका लागि ९० रनको लक्ष्य दिएको छ । मलेसियाको युकेएम ओभल मैदानमा टस हारेर पहिले ब्याटिङ थालेको थाइल्याण्डले निर्धारित २० ओभरमा ७ विकेट गुएर ८९ रन जोड्यो ।
थाइल्याण्डका लागि थिपत्चा पुत्थावोङले सर्वाधिक २० रन जोडिन् । त्यस्तैं बान्थिदा लेप्हाथानाले १९ तथा सुवानन खिओतोले १६ रनको योगदान दिइन् । नेपालको मनिषाकुमारी उपाध्याय र कृतिका मरासिनीले समान २–२ विकेट लिइन् भने स्नेहा महराको नाममा १ विकेट रह्यो । नेपाल अहिले जवाफी ब्याटिङमा उत्रेको छ ।
यसअघि ३ खेल खेलेको नेपालले २ खेलमा जित तथा १ खेलमा हार व्यहोरेको छ । नेपालले पहिलो खेलमा कतारलाई ७९ रनले हराएको थियो भने दोस्रो खेलमा युएईसँग १० विकेटले पराजित भएको थियो । तेस्रो खेलमा नेपालले भुटानलाई ४ विकेटले हराएको थियो ।
